– Mykje godt arbeid

Det er høgtid og feststemning på Nkoma Nursery College. Til korsong og dans blir Erna Solberg vist rundt på skulen, som er ei av 12 jordmor- og sjukepleieutdanningar Kirkens Nødhjelp støttar i Malawi. I eitt av klasseromma viser ivrige studentar korleis dei sjekkar hjerterytme og klipper ein navlestreng.

- Dette er utruleg viktig. Det å sjå korleis dei øver på å finne ut kva veg barnet ligg i ein mage, det er viktig i den lokale sjekken av gravide. Det at dei veit korleis dei skal undersøke eit nyfødt barn, er viktig for å unngå at så mange spedbarn døyr, seier statsministeren.

Manglar fagfolk og utstyr

Nyfødde i Malawi har 1900 prosent høgare risiko for å døy etter kort tid enn norske spedbarn. Av 100.000 fødande kvinner i Malawi, døydde 675 i fjor. I Norge er dødstallet 7 av 100.000.

Dei 12 sjukepleieskulane som Kirkens Nødhjelp støttar, er sentrale i arbeidet med å skaffe landet meir helsepersonell. Landets største problem er, utanom HIV/AIDS-epidemien, mangelen på fagfolk og medisinsk utstyr.

Utdanning er nøkkelen

Besøket på Nkoma Nursery College gir statsministeren håp.

- Det er gjort nokre gode grep når det gjeld helsearbeidet, mellom anna fordi landet har hatt gode samarbeidspartnarar. Kirkens Nødhjelp har gjort mykje godt arbeid på mange felt i Malawi, det gjer at landet greier å løfte seg, seier statsminister Solberg.

Den norske regeringa har peika på utdanning som eit av deira viktigaste tiltak for å bidra til utvikling i fattige land.

- Det er svært viktig at kvart enkelt land har nok helsepersonell. Malawi treng mange, mange fleire. Sjukepleiarane er mange stader grunnhelsetenesta, ikkje minst på landsbygda. Det er langt til lege og det er sjukepleiaren som må sørge for at nyfødde ikkje døyr, og at kvinner ikkje døyr i barsel, seier Solberg.