Kirkens Nødhjelp-magasinet
Aktuelt: Mali
– Om me ikkje gjer jobben vår, vil det oppstå mange små krigar i Nord-Mali, fortel Itous Bacrene. Han jobbar i eit område kor den minste konflikt kan vakse seg stor og få dødelege følger.
«Kampar mellom fulanarar og dogon: Minst 80 drepne»
«Samanstøyt i Koro: 33 døde og åtte skadde»
«Kampar blant lokalbefolkninga: Meir enn 30 døde i Kidal»
Desse avisoverskriftene har aldri nådd norske medium, men på nettaviser som skriv om Mali, har det jamleg kome rapportar om kampar blant sivilbefolkninga som fører til fleire titals drepne.
Desse kampane kjem i tillegg til den konflikten du kanskje har høyrt om, nemleg den militære kampen mellom islamistiske grupper og soldatar frå Mali, Den afrikanske union og Frankrike. I tillegg er FN inne med ein eigen operasjon.
Midt oppi alt dette jobbar Kirkens Nødhjelp med å skape fred. No er det starta opp ein fredskaravane som køyrer gjennom ørkenen i Nord-Mali.
– Me får folk til å sette seg ned og snakke saman. Alle får lagt fram sitt syn, så utformer me ein skriftleg avtale som begge partar signerer. Om me ikkje gjer denne jobben, vil folk kunne drepe kvarandre, fortel Bacrene.
Han veit kva han snakkar om. Han er sjølv frå denne delen av Mali og har lang erfaring med fredsbyggande arbeid. Det høyrest både brutalt og utruleg ut at nokon vil drepe andre fordi dei er ueinige, men i Nord-Mali er ikkje alltid dialog middelet som folk tek i bruk for å løyse konfliktar.
Kirkens Nødhjelp i Mali
Det er dei knappe ressursane i Nord-Mali som fører til konfliktar. Tilgang til beiteområde og vasskjelder kan skape splid mellom landsbyar, familiar og etnisitetar. Den væpna kampen frå opprørsgrupper og islamistiske grupper har bidrege til å gjere regionen endå meir konfliktfull. Nokre grupper vert skulda for å støtte opprørsgruppene, og dette bidreg også til splid blant lokalbefolkninga.
– Folk støtter ulike sider av konflikten. Men me må få dei til å snakke saman, og me må syte for at folka på grasrota står saman, seier Bacrene, som trur fred vert skapt frå botnen av eit samfunn og ikkje frå toppen.
Konflikten i Mali er framleis høgst aktuell, og FN-operasjonen i landet vert omtalt som den farlegaste i heile FN si historie. Varig fred må byggast frå botnen, og det er dette Kirkens Nødhjelp bidreg til gjennom fredskaravanen, opplæring av ressurspersonar, støtte til lokale fredskomitear og lokale forsoningsmøte.
Tilbake